O le aofaiga o se su e 2 miliona ma le 50 afe tala na su ai e se ulugalii le alii foma’i le susuga Aiono Dr Alec Ekeroma, ua taofia e le faamasinoga le faaauauina, e mafua i le faalēaogāina ma le soloia ai o le Tulafono na autu iai lea finauga faaletulafono, le tulafono lea o le toe fuataina o tulafono o le tausaga e 1964 le Law Reform Act 1964.

O lea su poo se tagi i se finauga mo se taui, na mafua i le uma ai o le ola o le pepe a le ulugalii o Mr and Mrs Thompsen Fuataga.

O le alii fomai na molia le susuga Aiono Dr Alec Ekeroma ua avea nei ma Faatonu Sili aoao o le matagaluega o le soifua maloloina, o le fomai sa feagai ma le vaaia o le tina ma’itaga.

E pei ona faailoa ai i le faaiuga a le afioga a le Faamasino Sili le afioga Satiu Simativa Perese, na fofogaina i le Aso Lua o le vaiaso nei, o le faia o le poloaiga a le faamasinoga e taofia le suesueina o le tagi poo le strike out e mafua ona o le mataupu na faaulu i le faamasinoga i le masina o Mati o le tausaga e 2022 ae o le Tulafono o le Toe Fuataina o Tulafono o le 1964 na faamuta lona faaaogāina pe repeal i le tausaga e 2020.

Sa tuuaia e le ulugalii le faatamala o le alii fomai i le faatinoga o ona tiute o le mafuaaga lea na uma ai le ola o le la pepe.

Sa molia foi e le ulugalii le Loia Sili a le Malo e avea ai ma sui o le Matagaluega o le Soifua Maloloina.