Ua fou le taitaifono ma sui uma o le Komiti Faafoe o le Pulega o le Faalapotopotoga o le malosiaga tau eletise poo le EPC.
Ua faamaonia mai e le Minisita o lea faalapotopotoga tuma’oti a le Malo le tofa Olo Afoa Fiti Vaai, le filifilia o le afioga Toleafoa Douglas Greevey, o se tamalii o le atunuu sa avea ma pule o le kamupani o le Bluesky Samoa mo ni tausaga ua mavae.
Faaalia e le Minisita i se fesootaiga i auala o fesootaiga faaonapo nei, e le gata ina filifilia le taitaifono fou o le komiti faafoe o le malosiaga tau eletise, ae ua filifilia foi ma sui fou o le komiti faafoe.
Faaalia e Olo sa toe talosaga mo avanoa o le komiti faafoe le taitaifono sa iai le afioga Pepe Christian Fruean ma sui sa seei i le komiti, peitai ua le toe filifilia.
E tolu tausaga le umi o le taimi o le taitaifono ma sui o komiti o faalapotopotoga tuma’oti uma a le Malo.
