Ua iai nei le faaiuga a le Kapeneta ua faamautu ai le aloaia o le toe tasi o le pulega o le Matagaluega a le Soifua Maloloina, i le tuanai o le 4 tausaga talu ona pasia le tulafono e toe tuufaatasia ai ae e lei faatinoa ina ua aliali mai le feteenaiga o le asosi a foma’i ma le komisi o galuega a le Malo i le mataupu i ovataimi o foma’i.
O lea foi faaiuga a le Kapeneta ua faamaonia ai foi le faatinoina o tofiga mo le toe faatulaga lelei o avanoa faafoma’i, ma le taiala o faamanuiaga mo matafaioi faapitoa.
Ua aiaia foi i le faaiuga le totogi atu o ovataimi o tagata faigaluega tumau o le matagaluega e faasino i foma’i ma tausi soifua ma o le a faaalu ai se vaega tupe e silia i le 7 miliona 300 afe tala ($7,349,446.40).
O le a fua le totogiina atu o ovataimi nei i le aofaiga o le totogi o loo maua i le tausaga.
Ua faatupe mai lea i le tala autu o le tupe ua mae’a pasia e le Palemene mo le tausaga faaletupe ua faagasolo 2023 i le 2024.
Ua aiaia foi i le faaiuga lava lea le totogi atu o le alauni ua ta’ua o le Responsibility Allowance mo foma’i o loo faakonekarate ma e lē agavaa i le ovataimi ma o le a faaalu ai se vaegatupe e tusa ma le $1.08 miliona tala.
Ua faatulaga le tupe maua o lea alauni i le 60 pasene o le aofaiga o le totogi o loo maua i le tausaga e le foma’i o loo galue i aiaiga faakonekarate.
Ua molimauina i le faatulagaga o foma’i konekarate ma tupe o le a latou maua mai lea alauni e ausia e se foma’i le $76,000, pito ane iai le 64,000 ma le 32 afe tala.
Ua faaalia o Tesema o le tausaga nei e tatau ona mae’a ai ona faia fetuunaiga o tupe poo virement ona amata faatulaga loa lea o alauni nei mo tausaga o lumanai.
O foma’i o loo faasino iai lea alauni o i latou e iai tomai faapitoa ma o loo faauluulu iai nisi o auaunaga faalesoifua maloloina i totonu o le matagaluega.
