E uma le vae muamua o le taitoafitu a le lalolagi lea sa fai i Dubai, o loo saofai mai Samoa i le tulaga 6 i le faasologa o ‘au a atunuu o lo auai i le taitoafitu, ae uma ane le vae lona lua i Cape Town i Aferika i Saute ua see ifo Samoa ma nofo i le tulaga fitu, mo le taimi nei a o lei toe amata isi vae o le taitoafitu a le lalolagi i le tausaga fou.
O Samoa sa iai i le Pool C faatasi ma Ausetalia, Canada ma Niu Sila.
O le taaloga muamua a Samoa na faia’ina ai ia Ausetalia i le 27 i le 7 a le Manu Samoa.
O lana taaloga lona lua na toe faia’ina ai ia Canada i le 33 i le 7 a le Manu Samoa.
O le taaloga lona tolu ma Niu Sila na manumalo ai i le 21 Samoa i le 14 a Niu Sila.
Ona see mai loa lea o le Manu Samoa ma taalo ma Spain i le quarter final i ‘au pito i lalo ma toe faia’ina ai ia Spain i le 24 i le 17 a le Manu.
Na toe faaauau le isi faia’ina a le Manu Samoa i le ‘au a le USA i le la taaloga i le 19 le Manu ae 24 le United States.
O le taamilosaga lenei i Aferika na maitauina ai le faaletonu o le taumafaiga a le Manu Samoa i lana taitoafitu, aemaise ai o le tele o ‘au lelei a atunuu e lei mafai ona ausia le sailiga o le ipu autu, e pei o Fiti, Niu Sila, Aferika ma USA, ae o Argentina o le ‘au lea ua sosoo nei vae e lua o le taitoafitu a le lalolagi o loo tulai mai pea i le sailiga o le saimupini o le ipu, ma o lea ua sola ai nei ma le siamupini o le taitoafitu i Cape Town i Aferika i Saute, ma o loo tulaga muamua foi i le faasologa o ‘au taitoafitu a le lalolagi.
