O taualumaga a le Palemene mai lena vaiaso na taualuga i le Aso Faraile na te’a nei, i le faailoa e le afioga i le Fofoga Fetalai le susuga Papalii Li’o Oloipola Ta’eu Masipa’u, o sui faipule ua filifilia i se komisi suesue faapitoa latou te suesueina tuua’iga a le faipule o Safata Tasi faasaga i le Minisita o Faatoaga ma Faigafaiva.
Na faailoa e le Fofoga Fetalai sui o lea komisi suesue faapitoa ina ua tuuina atu ai e le faipule o Safata Tasi le afioga Leaana Ronnie Posini, faamaoniga o ana tuua’iga na ia faailoa ai i le fono usu a Samoa, o faasalalauga mai fafo o loo tuua’ia ai le faamasinoga o loo lafi mai ai tua le Minisita o Faatoaga ma Faigafaiva le susuga Laauli Leuatea Polataivao Fosi Schmidt.
E to’aiva sui o le komisi suesue e ta’ita’ifono ai le Sui Fofoga Fetalai ae sui ta’ita’ifono le sui ta’ita’i o le Itu Agai.
O le Aso Lulu ua mavae i taualumaga a le Palemene i le saunoaga faalauaitele a le faipule o le itumalo palota o Safata 1, na agiga ai ana tuua’iga ma faatū ai e le Minisita o le Soifua Maloloina le lafo na pasia, ina ia tuuina atu i totonu o le 48 itula e le afioga Leaana Ronnie Posini faamaoniga o ana tuua’iga.
O le fonotaga a le fono aoao faitulafono ia Tesema o le tausaga nei, o le a tuuina atu ai se lipoti a le komisi suesue ua filifilia e silasila i mau ua tuuina atu e le faipule o Safata tasi e faamaonia ai ana tuua’iga.
O le amataga o lenei vaiaso fou ua toe faaauau ai taualumaga a le Palemene.
