O le pili taufaaofi a le susuga i le faipule ia MP Teanau Tuiono o loo finauina ai le toe faafoi mai o le sitiseni Niu Sila o tagata Samoa o loo faasolo pea lona iloiloina e le Palelemene o Niu Sila. O la tatou sailiga malo tele lea o loo feagai ma tatou o Samoa poo fea lava o le lalolagi o loo alala ma papa’aao ai… ia toe faafoi mai le sitiseni NZ o tagata Samoa e pei ona aumai e le faai’uga a faamasinoga maualuga i Peretania le Privy Council ae sa toe ave’eseina e le tulafono a Citizenship (Western Samoa) Act 1982 Bill.
O le tausaga e 2003 sa toe laga ai lenei mataupu e le Mau o Sitiseni lea sa savalia ai le Palemene e le mamalu o Samoa ma tuuina atu ai se talosaga (petition) o loo iai le sainiga lima e sili atu ma le 90,000. Peitai e le’i tafa le finagalo o le faigamalo sa iai i lea taimi.
O le tōina atu o le sitiseni o se isi atunuu i ni tagatānuu o se isi atunuu sa ia puleaina, e le’i tupu muamua i le lalolagi e pei ona iai i faamaumauga o saunoga a le Palemene o Niu Sila ina ua faia le tolaulauga lona lua o le pili taufaaofi lenei i le Aso Tofi, 24 Oketopa 2024. O le faafetai tele lea i le Atua ona o se tulaga maoa’e le mafai ona auaufaatasi o vaega faaupufai uma e 6 o loo i le Palemene o Niu Sila e lagolago le pasia o le pili taufaaofi lenei a MP Teanau Tuiono i lona tolaulauga lona lua.
E momoli atu ai le agaga faafetai ma le faamalo i le mamalu o Samoa o loo tula’i e lagolago lenei faamoemoe.
Faafetai atu foi ia te outou ua fesoota’i mai e resitala le lagolago i le Sailiga Malo a Samoa o loo faasolo nei. O le resitala mai o lou suafa e auala i le tuuina mai o lau imeli mo a tatou fesoota’iga, o le mafai ai lea ona e maua o faamaumauga mo le manino o lenei mataupu ma o le a tali ai foi le tele o fesili o loo fia malamalama ai.
1. O loo faapipii atu le lipoti a le soākomiti Governance & Administration Committee ma fautuaga i le Palemene lea ua pasia.
2. O loo faapipii atu faamaumauga o saunoaga i le Palemene o Niu Sila a vaega faaupufai e lagolago ai le pili taufaaofi a MP Teanau Tuiono i lona faitauga lona lua.
3. O loo faapipii atu foi le lipoti sa tuufaatasia e le Department of Internal Affairs o loo fautuaina ai le soākomiti.
4. E mafai ona maimoa i taualumaga a le Palemene o Niu Sila i le tolaulauga lona lua o le pili taufaaofi lenei i le youtube link: https://www.youtube.com/watch?v=5hQ2vNp4YGQ
E tele nisi o vaega e lē o faamalieina ai finauga sa tuuina atu i le iloiloga a le soākomiti e lē gata i le lē agavaa o fanau (descendants), o le leai o se suiga i le 10 tausaga talu ona maua le sitiseni Niu Sila ona faato’a’ā agavaa lea i le penisiona, faapea le tupe e totogi mo le faauluina o le talosaga mo le sitiseni.
O loo iai foi vaega e lē o i totonu o le pili taufaaofi sa ave iai finagalo e aofia ai le tulaga faigata o loo iai visa e malaga mai ai i Niu Sila e asi aiga aemaise o le fia malaga mai mo faalavelave. O faamatalaga uma ma faamaumauga o loo tuuina atu o loo tatala le avanoa e faasoa atu ai i aiga ma soo se Samoa.
Ma o loo tatala foi le avanoa e resitala sa’o mai ai o latou suafa ma imeli ina ia mautinoa lo latou mauaina o lenei fesoota’iga. E tāua tele le resitala mai o suafa ma imeli e mafai ai ona logopuialii lo tatou atunuu i le tatou Sailiga Malo e lē gata i lenei mataupu ae o isi foi mataupu tāua.
Faafetai
Teleiai
