E iai masalosaloga a le taitai o le ituagai o le aafia le Sui Komesina o Faigapalota ma se tamaitai faigaluega o lea Ofisa o le Mālō i fualaau faasaina ua ia lagolago ai le finagalo o le Fofoga Fetalai o le Palemene e fai se Komisi suesue e saili ai pe iai se sootaga o ia faiga solitulafono i le faaiuga o le palota tele ia Aperila.
O le finagalo o le susuga a Tuilaepa Lupesoliai Sailele Malielegaoi o se suesuega e faia o le a iloa ai foi ni faaletonu e fesootai i le tulaga sa lē faamanuiaina ai nisi o sui tauva o lana vaega faaupufai i le faiga filifiliga a Samoa.
Taua e Tuilaepa “Ae le’o sesē la le faaiuga a le Ofisa lena e agai iai a’o le meatonu lea e oo iai manatunatuga o tagata ona o le alii lea sa lafo uma iai le telē o le gaioiga e tupu ai fesili, pe na sa’o ona fai le faigapalota?. O le fesili tele lena, na sa’o iuga o le faigapalota na fai? E le’i aafia ai ni iuga o nisi o sui o le vaega lenei o le HRPP? Na la e taua ai le faia o le Komisi suesue e suesue ai le mea lea, leaga o le atalii o le Fofoga Fetalai, afai la o le atalii o le Fofoga Fetalai e lē mafai a na agai iai masalosaloga aemaise o lea tu luma, auā o le Alii pule o ia e avea le faatonuga o latou ia e faagaioia aemaise o le lima taumatau lea o le alii pule e faalagolago iai le alii pule.
O mafaufauga la lena lea ua tutupu lea oute tilotilo iai i faasalalauga ia ua aumai e tagata ua tatau ona fai se Komisi pe le’o iai ni faiga faatogafiti na fai e le tama lea ma nisi o latou e auautasi na afaina ai ni sui o le vaega faaupufai lenei “.
Taua foi e Tuilaepa “O’u te le’o faiatu e aafia le Fofoga Fetalai auā e lē faatonua e se tamā se atalii e alu e fai ni mea piopi’o, ae leaga o le tele o le tupe ua agai atu ii e ono tupu ai mea faapena. Afai la o lea e aafia le lima taumatau o le Komesina o Faigapalota telē a la le masalosaloga e ono tele se tupe e ono maua i le faatauina nanā o mea ia e mafai ai lea ona faatino ni solitulafono faapena”.
O lea fingalo a le taitai o le Ituagai ua tali iai le Minisita o leoleo ia Faualo Jeffrey Harry Schuster. O le lomiga a le Sunday Samoan o loo faaalia ai e Faualo na te teena le faia o se Komisi suesue ona maumau ai le taimi ma Tupe a le atunuu ona e lē taugofie lea suesuega ae matuā leai ni mau faavae e tatau ai ona faia se sailiiliga.
O loo faalua foi e Faualo i lea ripoti o le aafia o le Sui Komesina o Faigapalota i ni gaioiga solitulafono e fesootai i fualaau faasaina e leai se sootaga i le faaiuga o le faigapalota tele ia Aperila.
O le Aso 31 o le masina nei ia Ianuari o le a valaau ai mo le taimi muamua i luma o le faamasinoga maualuga moliaga o le umia o fualaau faasaina o le aisa ma umia o ni auupega malolosi poo ni fana e lē faatagaina ma nisi fana e le’i resitalaina faaletulafono na maua i le osofaiga a leoleo i le fale o le Sui Komesina o Faigapalota i Nuu Fou.
