Ua amata osofa’iga a Initia i nofoaga i Pakistan ma ua faamaonia mai ia faamatalaga e atunuu e lua.

Fai mai Pakistan e lua vaalele a le Ea Fosi a Initia na o latou fanaina i lalo e tali atu ai i le vevesi ua tula’i mai i le va o atunuu e lua.

Ua lipotia e le CNN na faia osofa’iga a Initia i nofoaga e talitonu o loo iai le ‘au faatupu faalavelave i le itumalo o Punjab ma Kashmir ae mafua mai lava nei vevesi ona o le faalavelave na tupu i le 2 vaiaso talu ai, na fasiotia ai tulisi i le faaitu o Kashmir e faatonutonuina e Initia, ma o latou tuua’ia ai loa Pakistan.

Ua faaauau i le asō taugafana i le va o itu e lua i o la tuaoi.

Ua ta’ua foi le tapunia o nisi o malaevaalele ina ua faalogoina le pā leotele ane o nisi vaega e lata i le aai i Pakistan.

Fai mai Amerika o loo latou mata’itū lenei vevesi.

O le faia o osofa’iga i le va o itu e lua, o se tulaga ua faato’ā toe tula’i mai lea i lea faaitu talu mai le 2019.

Puna o Faamatalaga: https://edition.cnn.com/world/live-news/india-pakistan-attack-kashmir-tourists-intl-hnk