Ua faailoa e le teutupe a le atunuu, Jim Chalmers i le Australian Institute of International Affairs, o loo sauni le Malo e faia se maliega ma le faletupe o le ANZ e faamautū ai le faaauau pea o teugatupe i le Pasefika.

Fai mai le ABC e ui i ni sootaga tetele i le itulagi peitai o loo iai pea lu’itau o loo feagai ma le faletupe i le itiiti o le polofiti e maua i le Pasefika ma ua vaaia ai le tapunia o nisi o ana auaunaga i totonu o le 5 tausaga talu ai.

Ta’ua i lea lipoti ua faia le faamatalaga lea mai le malo ina ia faatumau ai pea faletupe a Ausetalia ma Niu Sila i le Pasefika, o se tasi manatu ua ta’ua i le lipoti e faapea ona e lē o manana’o ia ulufale ane faletupe mai Saina.

O le ANZ le faletupe aupito taatele i le Pasefika e 19 ona lālā i atunuu e 9 peitai e pei lava foi o faletupe i isi atunuu e iai lava lu’itau e feagai ai aemaise i nisi o tulafono fou tau teugatupe.

O le faaaliga la mai le teutupe ua ta’ua ai o loo ua iai nei i vaega faai’u o le tuufaatasia o lea maliega ma le ANZ ma le faamoemoe e faaauau ai pea le auaunaga i atunuu e pei o Fiti faasolo atu i le Atu Kuki.

I se pepa o faamatalaga mai le ANZ ua aofia i le lipoti ua o latou faamaonia ai le faia o feutana’iga ma le malo o Ausetalia e faatatau i le mataupu lea i le auaunaga i le Pasefika ma e latou te taliaina foi le fuafuaga ma le faamoemoe o le a faaleleia atili ai le auaunaga i lea itu o le lalolagi.

E iai lipoti ua ta’ua ai o loo faamoemoe le Bank of China e faatū sona lālā i Port Moresby ma o loo mata’itū foi ma le toto’a e Ausetalia.  

Puna o Faamatalaga: https://www.abc.net.au/news/2024-11-11/government-striking-deal-to-maintain-anz-bank-pacific-presence/104587514