O le a fetaui Sonny Bill Williams ma se tasi foi alo o Samoa, Mark Hunt i se fusuaga ua fuafua i Sini i le masina o Novema. O le fusuaga ua folafola mai i le asō ma o le a faia i le Ken Rosewall Arena i le aso 5 o Novema i le tausaga nei.
O le uluai fusuaga lea a Williams talu ona faiaina ai le sa taalo i le AFL, Barry Hall i le masina o Mati.
O Williams 37 tausaga ma ua taua i le One News sa toleni lava faatasi ma Joseph Parker ma Tyson Fury i le United Kingdom i le taimi a o sauni mo le fusuaga ma Hall.
O Hunt 48 tausaga e faaigoa foi o le Super Samoan e na o le lua ana faiaina i fusuaga faapolofesa ma le tutusa e tasi. O i laua uma ia na soifua ane i Aukilani ae ua nonofo uma nei i Ausetalia.
