E lata i le toluselau sui o le Pasefika i Aotearoa nei, na auai i le valaaulia a le Tupu o Tūheitia i le faamanatuina o le 18 tausaga talu ona seei mai i lana nofoaiga.
E scilia ma le 10 atumotu o le Pasefika na auai e aofia ai ma Samoa, e tauala mai i le faalapotopotoga o le Pacific Leadership Forum poo le Fono a Ta’ita’i o le Pasefika.
O se faatasiga na molimauina ai le patipatia e lana afioga i le Kiingi Tūheitia Potatau Te Wherowhero VII ae faapea ai tagata Māori o le omai faatasi o sui o le Pasefika e opogi ma faaali lo latou lagolago i tangata whenua.
I le sauniga e faafeiloa’i faapitoa ai le aumalaga atu i le Turangawaewae Marae i Ngāruawāhia na maitauina ai le faatino e tangata whenua o a latou tu ma agaifanua; e pei ona amata i se pōwhiri ma folasaga eseese e faafeiloa’i aloa’ia ai sui uma na auai aemaise ai o le Tupu o Rarotonga poo le Atu Kuki na ta’ita’ia le savali e agai i totonu mo lea sauniga amata.
O le ta’ita’ifono o le Fono a Ta’ita’i o le Pasefika i Aotearoa nei, Teleia’i Edwin Puni sa amata mea i le folasia ai o le auai o sui o le Pasefika i le faamoemoe o le Tupu.
Sa molimauina ai le faatāuaina e sui mamalu uma o le vaiaso o le gagana Tonga i Aotearoa i le tuu ai o le avanoa ia Tonga e latou te saunia le waiata poo le pese mo lea feiloa’iga.
Na tuu le avanoa i sui eseese uma o le PLF e saunoa ma talatala nisi o a latou meaalofa ua saunia mo lana afioga, Kiingi Tūheitia.
O atumotu na auai e aofia ai Tonga, Rarotonga, Fiji, Tuvalu, Kiripati, Tokelau, Papua Niu Kini, Niue, Solomon Islands, Vanuatu, Hawaii ma Samoa.
I le aumalaga lava ia a Samoa na fai le afioga ia Fepuleai Semi ma sui o Samoa e faaleo lona agaga faafetai ma faailo le māfana o le mafutaga a Samoa ma tagata Maori.
Na faai’uina saunoaga a le tamalii i le molimoli o meaalofa; o measina a le atunuu e pei ona iai le tanoa ‘ava tele, o le ‘ulafala, fue ma le tootoo, ae salani i se taualuga na saasaa ai le taupou, le afioga i le Tootooalii ia Tofilau Esther Tevaga, ae aiaiuli ai tamalii ma sui o le aumalaga.
O nisi o paaga na faalapotopotoga na auai i lea faamoemoe e aofia ai Asosi o Auaunaga Faafomai i le Pasefika, le Pacific Medical Association, o le Fonua Ola, ATHWA ‘Ākiheuho, Penina Trust, Ta Tupu Foundation ma le St Johns.
Sa molimauina ai foi le auai o nisi o fanau aoga na saasaa ma faafiafia mo lea aso tāua.
Na iloga foi le faatasiga i le mafai ona patipatia faatasi ai e le Tupu o Tonga, Tupou VI ma lana masiofo e pei foi ona auai le Tupu o Rarotonga ma lana masiofo.
