Ua toe faaauau le nofo taofia i le vaaiga a leoleo i le falepuipui i Tanumalala alii e toalua o Viliamu Faaleleiga ma Joseph Lafaele lea o loo tuuaia i lo la faia o ni gaioiga tau faasese na resitala ai ni tagata mo avanoa i galuega faavaitaimi.

Na tulai i laua i le faamasinoga maualuga i le amataga o le vaiaso ma e lei tuuina atu ni la tali ona o le talosaga a leoleo e fia manaomia se isi lua vaiaso e faamaea ai suesuega ma faamautu moliaga a ia alii talavou. O loo iai i faamaumauga a leoleo sa molia muamua i ni solitulafono e pei o le taufaasese ma le lima tagovale ma nofo sala ai i le falepuipui.

O Viliamu ma Joseph na pueina ma taofia e leoleo i le maea o se suesuega sa agai i se nofoaga na faatino ai le resitalaina o tagata faigaluega faavaitaimi e ia taulele’a. Ua faailoa e Loia a leoleo o suesuega o loo faagasolo pea e ono iai ma nisi e toe molia ai.

E pei ona silafia o lenei mataupu ma faaoo atu i leoleo ina ua agai atu i latou e lata i le to’a 20 i le malae vaalele e sauni mo le faimalaga atu i atunuu i fafo peitai e leai se malaga i lea aso ma e leai foi ni o latou igoa i se lisi o ni tagata galulue i galuega faavaitaimi.