O le afea ai o le itumalo o Aana Alofi No.2 i le faalauiloa a le vaega faaupufai a le Faatuatua i le Atua Samoa ua Tasi i le Aso Toonai ua mavae na faailoa ai se tasi o tamalii o le itumalo ma le afioaga o Fasitoo Uta sa avea ma tofi o le itumalo i le Palemene mo le tele o tausaga le afioga Toleafoa Leaupepe Faafisi ua lagolago le itumalo i le faamoemoe a le FAST ona o lea ua tu i le foe o le faatautaiga o le faigamalo o le atunuu.
Na saunoa Leaupepe o le agaga autu ia fusia tagata uma i le fealofani e ui e eseese talitonuga ma le lagolago i vaega faaupufai. Taua e Leaupepe “O le fatu sa ou manatu e tōtō i le matou nuu o le fealofani aua nei avea ni itu faaupufai e lepeti ai le fealofani o nuu”.
Taua foi e Leaupepe “O ai lava e HRPP ao ai foi e FAST lea ua tuufaatasi o latou agaga i le aso lenei e tatou te fiafia faatasi, tatou te faalogologo ma faafofoga i mataupu lae e saili Mālō ai se manuia o Samoa ae ia tatou o e opogi poo ai le Mālō e tulai mai o e opogi”.
E pei ona silafia o le afioaga Toleafoa Leaupepe Faafisi o se sui lagolago o le vaega faaupufai e Puipuia Aiā Tatau o Tagata le HRPP lea sa avea ai ma Fofoga Fetalai ma avea ai foi ma Minisita o le Kapeneta. O le maea o le paeaiga o le nofoaiga 16 o le Palemene i le amataga o le tausaga nei ao loma le faigapalota ia Aperila na faamavae ai mai le tofi faipule o lona itumalo.
Sa afea i le finagalo o Leaupepe le tulaga sa iai le taunuuga o lea faiga filifiliga a le atunuu ma Ia taua sa leai sona manatu e oo i se tulaga uiga ese le faaiuga o lea palota tele ona o mea na tutupu ma aliali mai ma oo ai i le faamasinoga e saili ai se fofō o tulaga lē mautonu o upu fai o le atunuu i ala o le tulafono.
