O loo iloilo e le malo pe tatau pea ona maua fua Rapid Antigen Tests poo RATs faapea ai ma ufi fofoga, masks.
Ua faamautinoa mai e le sui o le matagaluega a le soifua maloloina o lea o loo mataitu pea e le malo le fuainumera o tagata ua aafia i le koviti, o i latou o loo taofia i falemai faapea tagata maliliu ma fetuutuunai poo talafeagai pea le faatupe e le malo o siaki nei o le koviti faapea ufi fofoga lea o loo maua fua i le taimi nei.
O le masina fou lea o loo taoto e uma ai le faiga o loo faatupe ai nei siaki ma ufi fofoga o le koviti lea o loo maua fua e tagata lautele, peitai afai ae finagalo le malo e faamuta o lona uiga e amata ane le masina o Mati ua leai.
Ae i se vaaiga i tagata ua aafia i le taimi nei ona o le vairusi lona lima lea o loo aafia ai le toatele o tagata Niu Sila, o loo maua mai i siaki o loo faaaogā ai vai leaga o otaota le toatele o tagata ua aafia i le koviti.
E oo mai i le Aso Sa faatoa uma atu e silia ma le 324 tagata o loo i le falemai ona o le koviti ae o tagata ua faamaonia ua maua i le koviti i totonu o le vaiaso talu ai e 8040 cases fou ua lipotia ma o le 74 o i latou na lipotia o tagata na toe maua lava i le vairusi i totonu o le tolu masina.
