Ua faaopoopo e le malo o Niu Sila le fuainumera o tagata e omai i galuega faavaitaimi.
E 1,250 isi tagata faaopoopo lea o le a omai i le va o le tausaga lenei faasolo atu i le tausaga a sau, ma o lona uiga o le aofai atoa o le a 20,750.
O se faamaoniga mai le minisita o le Immigration, Erica Stanford, e tāua tele lea faaopoopoga ma o le i’uga foi lea o faatalanoaga ma fale faigaluega o loo i lea maketi.
O se faaopoopoga foi o lea ua tuu iai ma le atunuu o Timor-Leste i le lisi o atunuu o loo omai ai tagata galulue faavaitaimi.
I nisi lava o suiga, o lea foi o le a lē moomia le tatau ona totogi e kamupani Niu Sila o tagata nei e omai i galuega faavaitaimi le 10% i luga atu o le totogi maualalo faatulafonoina poo le minimum wage se’i vaganā o se tagata faigaluega e maualuga agavaa.
E ese mai i totogi ma itula faigaluega o loo sau i suiga ua faailoa mai, mo le penefiti o tagata faigaluega o lea o le a mafai ona agavaa i multi-entry visa ma mafai ona agavaa i isi foi a’oa’oga e tusa lava pe lē fesoota’i ma le galuega.
E iai isi suiga faaopoopo o loo agai mai i le tausaga fou mo galuega faavaitaimi i Niu Sila, ma e faapea o loo taula’i lea i le manuia o tagata galulue.
Puna o Faamatalaga: Government to increase cap on seasonal workers (1news.co.nz)
