O le isi foi alii lea na alu ma le fana ‘aū i le faleoloa o Aldi e sue ai se tamaitai 15 tausaga ua pei o loo saili se meaola se’i tulou, ua maua lelei i video a le CCTV le taimi na ia faatino ai lea tulaga. 

Fai mai le 9News o le tagata lea na agai atu ma le fana ‘aū ae sa momo’e solo le teineititi i totonu o le faleoloa o Aldi e saili fesoasoani ae tafana atu e le alii lea i ‘aū.

Na aafia se vaega o lona tino i isi ‘aū a le alii lea a o tafana ane o ia ma o se vaaiga faigata ona silasila iai i latou sa iai i le faleoloa i lea taimi aemaise ai foi la nisi na maimoaina ata mai le CCTV i le faamasinoga maualuga i le Aso Tofi.

O le fesoasoani ane a nisi o tagata faatau ma se tasi Samaria agalelei na ia pupuni le teineititi mai lea osofaiga na ala ai ona faasaoina.

I le faamasinoga i le na fofogaina ai lipoti i tulaga faaletonu tau le mafaufau e aafia ai lea tagata ma ua ia tautino ai i le taupulepule e fasioti,

O le iuga e 10 ma le ‘afa tausaga i le falepuipui ma se’i vagana ua mae’a tuliina le 80 pasene o le faasalaga faatoa mafai ona talosaga i le palola.