Ua faamaonia mai nei e le malo le taofia ai mo le taimi nei le talanoaina o le tulafono taufaaofi, e faasino lea i le tapu ai o fanau e i lalo o le 16 tausaga le matutua ona toe iai i luga o upega tafa’ilagi poo le social media.
Faamauina o lea matāupu na finauina i felafolafoa’iga i totonu o le Palemene, e tusa ai ma sa’ili’iliga ma su’esu’ega a se komiti faapitoa, na faatautaia i aafiaga o le social media i fanau, aemaise lava faafitauli ua matua’i aafia ma tauāu ina lepeti ai le saogalemu o fanau.
Lipotia mai le lagolago ai e le Itu Agai poo le vaega faaupufai a le Leipa o le tulafono e tapu ai fanau, ae o loo maitauina le lē auai ai o le Green ma le ACT i lea fuafuaga, e manatu ua iai foi metotia a fanau i lenei vaitau e maua ai le avanoa e aga’i ai pea i luga o upega tafa’ilagi, ma e lē malosi lea tulafono o loo aumaia e le malo.
Faaali foi o latou manatu, e latou te lē talia lava ona e iai nisi o fanau e faalagolago i itulau i luga o upega tafa’ilagi, ma o le a tauāu ina mate ai le iai o se avanoa mo i latou e fesoota’i ai ma isi; ma e lē na o fanau o loo aafia ai i mea o loo tutupu i luga o upega tafa’ilagi.
Faamauina o lea tulafono taufaaofi a le vaega a le National, e mulimulitai lea i ‘ tulafono ua pasia a Ausetalia, ma o se pili na vave lava ona pasia i le masina o Oketopa pe a faatusa atu i le masina o Me o le tausaga na te’a nei lea na folasia ai mo le faatalanoaina.
Ae ina ua fesiligia le Minisita o A’oga ia Erica Standford i se tulaga ua iai le tulafono taufaaofi, ae tali le tama’ita’i faipule o loo taofia mo le taimi nei le talanoaina o lea pili, ae o loo faaauau pea faatalanoaga ma galuega e tusa ai ma lea fuafuaga.
Faamanino mai o lea ua aga’i le vaega a le National e faatulaga le tuu atu ai i totonu o le pili e tauala atu i le latou vaega faaupufai nai lo o le faigāmalo talu ai e lē lagolagoina e le ACT le tulafono taufaaofi.
E le’i mafai ona tali mai Erica Stanford i fesili e faamalamalama atili mai tulaga o le lē faaauauina ai o le talanoaina o lea tulafono taufaaofi.
Ae i se taimi ua sola, o lea na faamanino lava le lagolagoina malosi e le alii Palemia o Niu Sila, Christopher Luxon o le pili e taofia pe tapu ai ona iai fanau e i lalo o le 16 tausaga le matutua i luga o upega tafa’ilagi.
Ma o lea na ia ta’ua le amata faalauiloa mai ae e le’i oo atu i le vaitau o le faigāpalota tele.
O le masina lenei na aloa’ia ai le tulafono lenei i Ausetalia, ma ua faamauina le taga’i ai o kamupani e onaina polokalame i luga o upega tafa’ilagi (social media) i itu uma faapea le māta’itūina lelei e lē o iai se tamaitiiti e i lalo o le 16 tausaga o aga’i ai i luga, ma le oo atu lea i le $49.5 miliona Ausetalia e faasala ai pe a vaaia e lē o savalia lea tulafono.
Puna o Faamatalaga: https://www.rnz.co.nz/news/political/595263/bill-banning-under-16s-from-social-media-put-on-hold-erica-stanford-confirms
