Ua faailoa i luma o le faamasinoga e se tasi o tamā, o se molimau o loo molia i le lē usita’i i le poloa’iga a le faamasinoga e māfua i le su’esu’eina o le tagi tau palota a Falealili 1, na māfua ona lē auai atu ma lona to’alua e molimau i lea faamasinoga ona sa faalafi la’ua e le FAST, le patī faaupufai e pei ona silafia o le Faatuatua i le Atua Samoa ua Tasi.
O taualumaga a le Faamasinoga o Faigāpalota le Electoral Court i le Aso Tofi o lenei vaiaso, na oo atu ai molimau uma sa ave iai le poloa’iga e oo atu i le su’esu’eina o le tagi tau palota, o i latou ia ua molia i le lē usita’ia o le poloa’iga.
Na sii le aao o le molimau ma tuu iai le avanoa e le faamasinoga ma ia faailoa ai le māfua’aga na lē oo atu ai ma lona to’alua e fai a la molimau tuu fofoga.
Ua fautuaina ai le molimau e tapena lelei lana faamatalaga mo le valaauga o moliaga o le faalēmigao i le faamasinoga lea o le a amata su’esu’e i le Faamasinoga Maualuga i le Aso Gafua a sau nei.
Ua fautuaina foi i latou uma e limasefulutasi e iai le avanoa mo ni loia mo i latou ae a leai ia faia ni a latou faamatalaga e faailoa ai māfua’aga o le lē usita’ia o le poloa’iga e pei ona ave ai tusi samania e tula’i i le faamasinoga, peita’i e le’i oo atu le to’atele ae na o le to’atasi le molimau na usita’ia le poloa’iga.
E pei ona silafia o le tasi lea o laasaga o le faai’uga a le faamasinoga o palota na faamaonia ai le moliaga o le faia o faiga faaālatua faasaga i le sui faipule o Falealili 1, lea sa tuuina atu i le Loia Sili a le malo mo le faia iai o se iloiloga pe faia ni moliaga o molimau sa lē usita’i i le poloa’iga a le faamasinoga.
O lea faai’uga ua taofia lona faataunuuina i se poloa’iga lē tumau a le Faamasinoga Maualuga, ae se’i su’esu’e le talosaga a le sui faipule ua finau ai i le aafia o ana aiā tatau i lalo o le faavae ona o lea faai’uga, ma o le masina fou o Iuni e tagofia ai lea talosaga i se iloiloga a le Faamasinoga o Talosaga lea o le a silasila ai pe tatau ona su’esu’eina e le Faamasinoga o Talosaga poo le Faamasinoga Apili a le faamasinoga sili lea finauga.
O le lē faaauauina o le malosi o le faai’uga i le soloia o le nofoa o lea itumalo ua faaauau ai pea ona tauave e le sui faipule le tofi se’i mae’a tagofia lana talosaga, ma ua faaseetuagalu ai foi le afioga Toelupe Maoiautele Poumulinuku Onesemo ma ona tofiga i le Kapeneta.
