O le afiafi o le Aso Tofi o lenei vaiaso na faatumulia ai i malo valaaulia le faletalimalo o le Samoa Beach Resort i Mulifanua, i le sauniga ua aloa’ia ai le suiga o le pulega o lea faletalimalo ma umusa ai le faafouina o nisi o vaega o le faletalimalo sa toe faaleleia.
O se pisinisi tau tagata tafafao sa faaigoa muamua o le Sheraton Beach Resort peita’i o le tuana’i o le sefulu tausaga sa faafoe ai e se isi pulega, o le masina o Ianuari o le tausaga nei na suia ai loa ma tofia se ulua’i tamalii o Samoa na te pulea, le afioga Tootooleaava Mark Wendt.
Ua faaalia e le pulega o le Samoa Beach Resort o suiga o lana pulega ua siitia ai ma lana tautua mo malo tafafao e ala i ana auaunaga eseese ua ofoina mo tulisi poo tagata tafafao mai fafo, faapea foi lo tatou atunuu e afea.
O le faalapotopotoga o le faaputugatupe mo le lumana’i manuia o tagata le N.P.F. ua avea nei ma faisea autū o le faletalimalo poo le major shareholder.
