O le ulua’i faaaliga o tu ma aganuu le Samoa Ne’i Galo ua faia mo a’oga maualuluga i Savaii lea sa faagasolo i le Aso Tofi o le vaiaso nei, ua sola ai le Kolisi o Alofi o Taoa ma le sili aoao o lea faaaliga sa tapena e le Matāgaluega o A’oga ma Aganuu.
O le mae’a o le faaaliga sa faia i le hall a le Kolisi a Ioane Poseko poo Don Bosco i Salelologa na faailoa ai ma kolisi ua maua le tulaga muamua i autū e tolu sa vaevae iai le faaaliga.
O le vaega o le Faatāua le Va Tapuia ua tulaga muamua ai le Kolisi o Mataaevave, ma sa auai ma Kolisi o Uesiliana ma le Kolisi o Palauli i lea vaega.
O le vaega o le Faatāua o Tu ma Agaifanua ua tulaga muamua ai le Kolisi o Amoa, ae sa tausiniō ai ma le Kolisi a Ioane Poseko ma le Kolisi o Savaii i Sisifo.
O le Kolisi o Alofi o Taoa ua maua le tulaga muamua i le vaega o le Faatāua o le Gagana lea sa tausiniō ai ma le Kolisi o Palauli i Sisifo.
O le tulaga lua, ma le tolu e le’i faailoaina ae ua fautuaina kolisi sa tausiniō e maua mai le matāgaluega poo ai ua maua ia tulaga.
O le vaega o Taupou ua manumalo ai le Kolisi o Alofi o Taoa ae o le Manaia a le Kolisi o Savaii i Sisifo ua tulaga muamua i lea vaega.
O faailoga faapitoa na maua e le Kolisi o Palauli, Alofi o Taoa ma le Kolisi o Uesiliana.
O faailoga tupe ma ipu sa maua e kolisi ua mau tulaga faapea faailoga faaopoopo ma meaalofa mai kamupani sa lagolagoina le faaaliga muamua o le Samoa Ne’i Galo ua faia i Puleono i Salafai.
