Ua faailoa le lisi o atunuu o le lalolagi o o latou tagatānuu e aveesea faamalosi pe tipoti ese ma Amerika i le amatalia o le tasi o folafolaga a le Pelesetene ua iai nei o lea malo, o le toe faafoi i o latou atunuu o tagata o loo nonofo faasolitulafono i eleele o le Iunaite setete.

O Samoa le tasi o atunuu o loo faailoa i le lisi e 57 o tatou tagatānuu o loo nonofo faasolitulafono i Amerika, ae o Tonga e 151 o latou tagata e aafia i lea gaioiga.

O atunuu o Tuvalu ma Vanuatu e tutusa e ta’itasi tasi tagatānuu o loo lavea i le ‘au aveese faamalosi, o Papua Niu Kini e to’alima, o Solomona ma Kilipati e tutusa e to’atolu o latou tagata o loo nonofo faasolitulafono i lea malo tele, ae o atunuu i le Atu Maikoronisia o le Atu Malesala e 39, o le FSM poo le Federated States of Micronesia e 72.

O Niu Sila e 166 o latou tagata o loo faailoa foi i lea lisi o atunuu e lavea i le ‘au aveese faamalosi.

O Ausetalia e 261 o latou tagata.

O Samoa o se tasi o paaga totino a le malo o Amerika mo le tele o tausaga.