E iai le talitonuga ua toe lava o le Malumalu o le Ekalesia Faapotopotoga Kerisiano Samoa o le afioaga o Apia, vaaiga tuai o fausaga o fale mai taimi o pulega faakolone o loo iai pea i totonu o le taulaga, pe a fua i ata tuai o vaaiga o Apia mai tausaga e tele ua mavae.
O le tausaga e 1892 na amata fausia ai le malumalu i lona vaaiga o loo iai nei seia vagana ni tausaga sa toe fausia ma faaleleia ai, ae o loo tumau pea vaaiga o foliga o le malumalu mai le taimi na fausia ai seia oo ina mae’a ma umusa ma ua atoa i le masina nei le 130 tausaga o le Malumalu.
O loo fausia le maota tapuai i le nofoaga o loo lagomau ai le alii misionare o le LMS o Ioane Viliamu na aumaia le lotu i Samoa, ma o loo faafesagai i le itu ala i tai ma le ma’a faamanatu o le alii misionare Peletania. E tusa ai o tala faamaumau o le galuega e pei ona faailoa i faasalalauga i luga o fesoota’iga televavave, e amata fuafua le galuega o le Malumalu o loo vevela tāua i le va o vaega’au ma fitafita a Malietoa Laupepa ma Mata’afa Iosefo o nisi o tulatoa o le atunuu sa lotolotoi i sailiga Malo a o fetuatuana’i le atunuu.
O le mafuaaga lea o le umi o le galuega o le falesa lea e ono i le fitu tausaga na fausia ai ae faato’ā mae’a. O le ‘afa tele o le tausaga e 1889 lea na tu’ia ma malepe ai i gataifale o le taulaga o Apia vaatau o Peretania ma Amerika o se isi lea pine o taimi o loo faagasolo le galuega. Na fai meaalofa ai le Malo o Amerika i lena taimi i le ekalesia ma le afioaga o Apia ona o le lavea’iina o nisi o seila o lo latou vaatau o le USS Trenton.
Ua tapena le ekalesia EFKS a Apia e faamanatu le 130 tausaga o le malumalu lea ua faatulaga o le Aso Sa lona tolu o lenei masina le aso 21 o Aokuso e faataunuu ai.
