E iai nisi o loo talanoa pea i le asō ma taumate poo le ā tonu se malama e fai si malosi o lana susulu na vaaia i le lagi i le taeao analeila i le itu i Sasae o le atunuu.

Na lipotia e le 9News o se video mai se meapu’eata o se taavale na maua e se tasi ofisa faasalalau i Sini ua iloa ai le malama lea pe na o ni nai sekone na vaaia ai ma toe mou.

Na iai tagata na valaau atu i le leitio faasalalau le 2GB mai Sini e oo i Toowoomba i Kuiniselani e faapea na o latou vaaia foi lea malama.

Saunoa se tasi e iai le tomai i mataupu tau le vanimonimo, Brad Tucker mai le Australian National University e lua lava vaega e atagia ai, o se meteor poo se fetu pa’ū foi e pei ona faaigoa ai e le to’atele, poo ni maamaa foi mai isi paneta i fafo atu o le lalolagi.

Na ta’ua e Tucker o le isi faamaoniga o lea manatu o le vave ona toe mou o le malama auā e faapea le tulaga e iai mea faapea e na o ni nai sekone e pasi ane ai.

E tele finagalo taumatemate o le atunuu ua faailoa i le social media e uiga i lea malama, e lē iloa tonu poo le ā.

Puna o Faamatalaga: https://www.9news.com.au/national/meteor-caught-on-dashcam-australia-east-coast-early-morning/6c352965-e18e-4258-af8c-08605d427da0