Ua fai si faaumiumi o suesuega a leoleo i le sailia o si tina matua e 78 tausaga mai Kuiniselani lea e talitonu leoleo e foliga pe ua lafoai lona tino maliu i se kalone lapisi. 

O lipoti mai leoleo ua ta’ua ai e le o kolosi esea ia latou suesuega le faia e nisi poo se tasi foi o se gaioiga le manuia i sia tina matua, o se faiaoga ua litaea e suafa ia Lesley Trotter.

Ua faailoa ai i le asō se finagalo o se tasi o polofesa lagolago i le Bond University, o Terry Goldsworthy, o le suesuega o loo faagasolo e le taumate o loo faaaoga ai faiga faaonaponei ae o lona manatu o le a umi ma faigata le sailiga. 

O loo iai le fuafuaga a leoleo e faaauau le sailiga i nofoaga ia e lua e lafoai iai le otaota i le faaiuga o le vaiaso nei ae fai mai le polofesa o se galuega umi lea le sailia o le tino maliu o lea tina.

E oo mai i le taimi nei e leai se isi o masalomia i lenei faalavelave.