E 2 tausaga ma masina e 4 ua nofosala ai i le falepuipui i Tanumalala le taulealea o Francis Mamoe o Vaiusu ina ua faamaonia ona moliaga o le faaoolima i se avetaavale o se taavale la’upasese poo se taxi, ae ua faamaonia foi isi ona moliaga o le umia o se aupega matautia o se fasi uamea, ma lona faia o se gaioiga na osofai ai le avetaavale ae o loo alu le taxi i luga o le auala.

O faamaumauga a leoleo e pei ona faailoa i le faaiuga a le Faamasinoga Maualuga e faapea o le maketi o i’a i Savalalo na faatū ai e Francis le taavale la’upasese ma la malaga ai i Vaitele fou.

A o alu le la faigamalaga ae fesili loa lē ua nofosala i le avetaavale pe aisea na vili atu ai i lona toalua ma fai atu ni tala lē manuia a o faalogo iai lana fanau.

Na fesili ai foi ma lē ua nofosala pe sa’o o loo fai se la faapouliuli ma lona toalua.

E leai se tali a le avetaxi i ia fesili, ae osofai loa e lē ua molia le avetaavale o le taxi ma ia tāina i se fasi uamea.

O le gaioiga lea na lē mafai ai ona faatonutonu le taavale ma tifa ai loa le taxi ma alu atu so’a le isi taavale la’upasese o loo alu i luga o le auala.

E ogaoga manu’a o le avetaxi na malaga ai Francis e pei ona faaalia i le lipoti a le foma’i, ae na faamanu’alia foi le avetaxi o le isi taavale la’upasese na afaina i le faalavelave.

O le silasila a le faamasinoga i le gaioiga na tupu e fai lava si matuiā ona ua lamatia ai le saogalemu o tagata ma taavale feoa’i, ae o le uamea foi na umia o se aupega matautia.

O le 28 masina ua faasala ai Francis ua toesea ai aso sa nofo taofia ai a o faia suesuega a leoleo.