O le fitu masina o le tausaga faaletupe o loo faagasolo nei, mai le masina o Iulai e oo mai ia Ianuari o lenei tausaga 2023, ua faamauina e le faletupe tutotonu o Samoa le vaaia ai o le toe totogo a’e o le ola lauusiusi o le tamaoaiga o le atunuu, i le tuanai atu o taimi faigata sa matua olopalaina ai pisinisi ma isi auaunaga tau tupe ona o aafiaga o le faamai Koviti-19.
O tupe faamomoli mai fafo i totonu o lea fitu masina na siitia i le 20 tesimale 5 pasene, i se aofaiga e 511 tesimale 33 miliona tala.
E faatusa lea i le fitu masina o le tausaga faaletupe ua mae’a mai le masina lava o Iulai o le tausaga 2021 e oo atu i le masina o Ianuari o le tausaga 2022 e 424 tesimale 41 miliona tala na maua i tupe faamomoli mai fafo.
O nei faamaumauga ua faailoa ai foi e le faletupe tutotonu o le sasaa mai o tupe faamomoli e malosi lava le tafe atu i aiga o lo tatou atunuu lea ua faamauina e tusa ma le 15 tesimale tasi pasene o tupe faamomoli i totonu o le fitu masina o le tausaga faaaletupe o loo faagasolo i le aofaiga e 447 miliona tala na lafo mai i aiga.
O le atina’e o tagata tafafao o tupe na maua mai ai i le fitu lava masina lea, ua siitia foi e pei ona faamauina se aofaiga e 194 miliona o tupe na maua ai, mai le 59,380 o tagata na malaga mai fafo.
O le silia i le 26 afe o tagata malaga mai fafo o i latou sa asiasi mai i aiga na tafe atu i le tamaoaiga a latou seleni e tusa ma le 104 miliona tala.
E oo mai i le masina o Ianuari o le tausaga nei ua faamauina se aofaiga e 894 miliona tala o tupe teu faaagaga i fafo mo fefaatauaiga o oloa, ma o se siitaga e tusa ma le 16 tesimale 4 pasene ua maualuga atu ai nai lo le fitu masina o le tausaga faaletupe ua mae’a.
O lea aofaiga tele o tupe teu faaagaga i fafo ua faaalia e le faletupe tutotonu ua mautu ai le faasoa mo le aumaia o oloa mo le isi iva masina o lumanai.
