Ua i’u le taumafaiga a le aulakapi taitoafitu a le Manu Samoa i taaloga a le Olimipeka i Farani, ua lē manuia i sailiga o pine, ae ua saofai i le tulaga 10 i le faasologa o au a atunuu na maua pine ma faasolo ifo ai i au e sefulu pito i luga.
O Farani ua ulaina le pine auro, Fiti le pine siliva, ae pine apa memea le aulakapi taitoafitu a Aferika i Saute.
O Niu Sila ma Ausetalia ua lē manuia foi i se pine ae ua tulaga 4 Ausetalia ma Niu Sila i le tulaga 5.
O Aialani ua tulaga 6, fitu o Argentina, tulaga valu Amerika, lona iva ai Kenya ma Samoa i le tulaga sefulu.
O loo tatou tālia le taunuuga o isi taaloga e valu o loo tausinio ai le aumasii a Samoa auā ua mae’a taaloga lakapi taitoafitu sa iva iai taaloga o loo tausinio ai le ‘au a le atunuu.
O taaloga e valu o loo faaauau ona tausinio ai Samoa, o faipelega, siisii uamea mamafa, afeleti, tuuga vaafaila, tuuga alo vaa, Judo, pii, ma le tuuga aau.
