Ua folafola mai nei e le alo le toe tatalaina o le skilled migrant and parent visa categories poo le vaega o tagata malaga mai i le atunuu e iai tomai atoa ma visa faalematua.
O le minisita o femalaga’iga Michael Wood na ia folafola lea tulaga i Aukilani i le asō.
Fai mai Wood o se vaega lenei o fuafuaga e toe koneti Niu Sila ma le lalolagi ina ua amata toe foi i tulaga masani le lalolagi talu mai aafiaga o le Koviti-19.
Ta’ua e le minisita o loo faalogologo ma le totoa i popolega o pisinisi lea ua matele ina ioeina le faaaoga o tagata malaga mai e iai tomai e faigaluega ia latou kamupani peitai e faigata ona faafaigaluega mai ni tagata faavaomalo.
Na saunoa la le minisita o suiga ua faatulaga e le matagaluega o le a tatau ona faamama ai le avega i le mataupu e faatatau i le toaitiiti o tagata faigaluega.
Ua iai foi suiga ua folafola e le malo i lalo o le parent category visa lea e aofia ai le siiia atu i le 2,500 talosaga i le tausaga ma o le a faaitiitia foi le income threshold poo tupe maua e tatau ona ausia e tagata o loo talosaga.
