Ua faaauau tiute tauave o nisi o Malu o le Malo poo leoleo, i le iai o se faaopoopoga i o latou faamanuiaga tau totogi ina ua siitia o latou tulaga faaleoleo poo police ranks.

E to’a 57 i latou ua siitia tulaga e aofia ai Malu o le Malo ua avea nei ma superintendent, toafitu ua see atu i le tulaga o le leoleo asiasi poo le police inspectors, toafitu ua avea ma satini sinia, to’a 20 o satini poo le au fai taai tolu, 18 corporals poo ua maua taai e lua, ma le toatasi ua siitia i le tulaga pule i le vaaia o tagata taofia poo le Manager custody, ae toalua ua avea ma ofisa e vaaia le falepuipui poo officers incharge for Prisons.

O le siitia o tulaga ua umia e i latou uma nei, ua mafai ona faatino ina ua mae’a suega ma ua pasi mataupu sa sueina faapea ma faatalatalanoaga sa faagasolo, a o lei faamautu ma faamaonia o latou tulaga faaleoleo fou ua latou umia nei.

O le Minisita ma le Komesina o le Matagaluega o Leoleo, Falepuipui ma le Ola Toefuataina sa faatumutumu iai mamalu o ē na auai i le sauniga na faalauiloa ai le vasega o leoleo ua faamanuiaina.