E 30 tausaga le matua o se tamaitai na faaulu lana tagi e faasaga i se alii papalagi o se tagatanuu Uzbekistan i tuuaiga o le faamalosi teine.
O le mataupu na tulai mai i le tausaga na se’i mavae atu nei.
I le toe valaauga o le mataupu i luma o le faamasinoga i le vaiaso nei ona o le talosaga a le alii o loo tuuaia e manaomia lona tusifolau e toe faaopoopo ai aso o lona visa malaga e aumau ai i Samoa nei.
Ma na talia e le faamasinoga lea talosaga, i lalo o tuutuuga e tuuina atu le tusifolau o lea alii i le Ofisa o le Loia Sili ma avatu i le ofisa o femalagaa’iga e faatino ai le toe faaopopoga o le umi e tatau ona nofo ai lea alii, ona toe faafoi atu lea i le faamasinoga.
I faamaumauga a leoleo i le mataupu e faapea, e 30 tausaga o le tamaitai o loo tagi, ma na tulai mai i se tasi o faletalimalo i le tausaga na tea nei.
O loo iai foi le poloaiga a le Ofisa o Femalagaa’iga e faasā ai ona tuua e lea alii le atunuu seia mae’a lona faamasinoga i le aso 13 o Me o le tausaga nei.
