Ua faaleo faanoanoaga ma atugaluga o le faamasinoga i le tiute tauave o leoleo i le suesueina o solitulafono matagā e tuua’ia ai nisi o tamā ae oo ina o le a fofogaina molimau, ae avatu le talosaga a leoleo e toe faaui i tua moliaga ma faalēaogā.

O faanoanoaga o le faamasinoga na faailoa ina ua lē faaauauina le faamasinoga o se tamā na tuua’ia ona o ni aafiaga o lana fanau teine e toalua, ina ua tuuina atu le talosaga a leoleo e ave i tua moliaga ma faalēaogā ona ua sui faamatalaga a tamaitai e toalua na faauluina le tagi, o alo teine ia e toalua o lē sa tuua’ia.

O le talosaga a leoleo na faailoa ai i le faamasinoga o le tala ua sui a alo teine o lea tamā, o la’ua ua pepelo ma tuua’iga faasaga i lo la tamā.

Ae o lea tamā sa faamaonia i se isi mataupu tau faamasinoga lona moliaga o le mataifale i le tausaga e 2008 lea sa nofosala ai i le falepuipui.

Ua faaalia e le faamasino o le Faamasinoga Maualuga le afioga Fepuleai Ameperosa Roma i lana faai’uga tusitusia, e ui ina malosi sona masalosaloga i le mafuaaga ua avatu ai le talosaga a leoleo, peitai ua talia e le faamasinoga le folasaga a leoleo i le faapea atu, e matuā aafia se tulaga o le faamaonia o moliaga ona ua toe sui faamatalaga a i la’ua na tagi.

Ua faailoa foi e leoleo ua tapena ni moliaga faasaga i le fanau teine a lē sa molia ona o le suiga o a la faamatalaga.

Faaalia e le faamasino e tusa ma le lima ni mataupu tau faamasinoga i solitulafono o moliaga tau faiaiga ona o talosaga faapea a le itu a leoleo.