O le ulua’i polokalame o le faailogaina o le 20 tausaga o le faalapotopotoga o le Toomaga mo ē Puapuagatia, o le tauvaga lauga mo fanau i a’oga tulagalua ma a’oga maualuluga, lea ua molimauina e le faalapotopotoga le maualuga o le sao o fanau sa tausinio, i lo latou faailoa lea o galuega lelei ma tāua o loo faia e le faalapotopotoga e pei ona folasia ia latou tapenaga.
I le mae’a ai o lea tauvaga sa faia i le maota o Tooa Salamasina i le amataga o lenei vaiaso, ua tula’i mai ai i le vaega o lauga mo fanau i a’oga tulagalua sa tauva, ua tulaga muamua le tamaitai o Jacinta Leslie Onesemo mai le a’oga tulagalua a tamaitai a le Ekalesia Katoliko le St Mary’s i Savalalo, tulagalua le lauga a Eddienna Lusia Ripley o le a’oga tulagalua a Robert Louis Stevenson, ae tulaga tolu ai Laki Esau mai le a’oga tulagalua a Luatuanuu.
I le vaega o lauga mo fanau i a’oga maualuluga ua tulaga muamua Falefatu Emmett Salele o le Kolisi o Samoa, tulagalua Leroy James Fruean o le Kolisi o Sanele, ma Pisa Belle Salele o le Kolisi o Samoa i le tulaga tolu.
E to’alima alii ae to’afā tamaitai ua maua faailoga i le tauvaga lauga o le 20 tausaga o le Toomaga mo ē Puapuagatia.
