O le malaga ese ai ma le atunuu o Solomona i le Aso Lulu o le susuga Leiataualesa Jerry Brunt i le mae’a ai ona aveesea le taofiga faaletulafono na tapu ai ona ia tuua lea atunuu, ua faailoa e lea tamalii i le auaunaga faasalalau o le Samoa Global, ua ia mana’omia se faatoesega a le malo o Tonga ona o tuua’iga lē faavaea ma sese sa salalau i auala o fesoota’iga televavave.
O ni tuua’iga ua faaalia e lea tamalii ua faaleaga ai lona tagata, o lona to’alua ma lana fanau aemaise o lona tuaa tina ua maliu.
E oo mai lava i lenei Aso Tofi e le’i toe maua mai se faamatalaga i lo tatou malo i se tala ane a le Loia Sili ma le malo o Solomona i le mafua’aga o le faia o le taofiga faaletulafono poo le Stop Order, lea na lē mafai ai ona tuua i le Aso Lua e Leiataualesa Jerry Brunt ma se tagata mai Vanuatu sa avea foi ma faamasino o le tauvaga tausala a le Pasefika lea atunuu.
O loo iai le talitonuga o se tamaitai mai Tonga sa aofia i le laulau o faamasino e to’alima na faauluulu i le susuga Leiataualesa Jerry, na faauluina le faaseā na mafua ai ona lotolotoi le ofisa o le Loia Sili a Solomona.
Ua faailoa e Leiataualesa e taunuu loa i Samoa amata tapena lana tagi e tuuina atu i le faamasinoga.
