O se tala fiafia tele mo nai o tatou tagata i Samoa, i latou e itiiti le silafia i le faaaogāina o fesoota’iga faatekonolosi e talosaga ai se visa malaga mo Niu Sila, ona o lea ua toe iai se fuafuaga a le vaega o mataupu tau femagalaa’iga a le malo o Niu Sila, e tatala se ofisa i Apia e avea ma nofoaga tutotonu e faagaioi ai visa e ala i le tuuina atu iai o pepa talosaga e pei ona sa masani ai.
E pei ona silafia na amata faaaogā fesoota’iga faatekonolosi i le taimi o le faama’i Koviti-19 e talosaga ai visa, ona o faaeteetega i le pipisi o lea faama’i pe a feoa’i tagata.
Peitai ina ua toe tatala tuaoi mo atunuu ma toe foi auaunaga i tulaga masani, na faaauau ai pea e Niu Sila ma Ausetalia ona faaaogā fesoota’iga faatekonolosi e talosaga ai visa.
O se fuafuaga na matuā ilitata iai le to’atele o o tatou tagata ona e itiiti lo latou silafia i le faaaogāina o ia fesoota’iga e faaaogā ai masini komepiuta.
O se suiga ua luutupe ai ofisa malaga tuma’oti auā ua latou tāpā le totogi mai se tasi e fia maua le latou tautua i le talosagaina o se visa i fesoota’iga faatekonolosi.
Ua faailoa e le vaega o femalagaa’iga a Niu Sila i Samoa e ala mai i le ofisa o le Komesina Maualuga o lea malo i Apia, o le aso 4 o le masina fou o Novema e tatala ai le ofisa tutotonu e ave iai pepa talosaga moni visa.
O se auaunaga o le a tatala mai le Aso Gafua e oo i le Aso Faraile mai le 9 i le taeao e oo i le 4 i le afiafi.
E lē o faailoaina mai poo fea o Apia o le a iai lea ofisa, ae o loo iai le talitonuga o le ofisa lava o le Komesina Maualuga o Niu Sila i le taulaga i Apia o le a maua ai lea auaunaga tāua mo o tatou tagata.
