A o faagasolo ai i Dubai le fono a atunuu o le lalolagi o loo saili fofo ai i ni faiga ma auala e faasaoina ai lo tatou paneta mai suiga ogaoga o le tau, o le fono a le soofaatasi o malo laiti poo le Alliance of Small Island States, lea o loo taitaifono ai le Palemia o Samoa, le afioga Fiame Naomi Mataafa, ua faatuina ai se finagalo e faatino se feagaiga e taofia ai le toe faaaogāina o malosiaga e pei o suauu, o le koale, ma le kesi poo le gas ae faamalosia le faaaogāina o malosiaga faafouina mai le natura o le siosiomaga e pei o se faataitaiga o le savili, ma le la o loo maua ai e nisi o atunuu le eletise.
I se pepa faalauiloa mai lea fonotaga ua faailoa ai o le Palemia o Samoa na ia faailoa lea fuafuaga ma faamauina ai le lagolago a lo tatou Malo i le fausia o lea feagaiga, lea ua iai ma le lagolago a nisi o atunuu e sefulutasi o le soofaatasi o Malo laiti o le lalolagi lea e aofia ai le Pasefika, le Atu Kerepeane, Aferika ma atunuu laiti o le Vasa Asia.
O ia atunuu e aofia ai Samoa, Vanuatu, Palau, Tuvalu, Tonga, Fiti, Niue, ma le Atu Solomona, o Antigua, Barbuda, Timor Leste, ma Colombia.
I lea lava pepa faalauiloa o loo ta’ua ai le saunoaga a le Minisita o Puna’oa Faalenatura ma le siosiomaga o Samoa na folasia i le fonotaga, lea sa faailoa ai e le afioga Toeolesulusulu Cedric Schuster, ua oo mai le taimi ua tatau ai i atunuu o loo pito tele lo latou sao i le faaleagaina o le tatou paneta, ona taofia loa a latou gaioiga o loo mafua ai suiga tetele ma ogaoga o le tau, o loo pito sili ona afaina ai atunuu laiti o le lalolagi.
O Samoa le isi atunuu ua faamauina le 38 pasene o le eletise o loo maua mai malosiaga faafouina poo renewable energy, ae o le sini o loo agai iai le taumafaiga a lo tatou Malo ia ausia le selau pasene o le faaaogāina o malosiaga faafouina e maua ai le eletise i le tausaga e 2025.
