O loo iai popolega tele o le atunuu o Kiripati e faatatau i le faaauau pea o le faata’ita’iga o meatau i le Pasefika, meatau ua ta’ua o inter continental ballistic missiles (ICBM).

Ua lipotia i le RNZ o le vaiaso talu ai sa faia ai foi se faata’ita’iga a Amerika na fana ane ai se a’upega mai le nofoaga autū o le Space Force mai Kalefonia ma lele ane i luga o le Marshall Islands.

Na faia le faata’ita’iga lea ae faato’ā uma atu le faata’ita’iga a Korea i Matu sa faata’ita’i ai foi ana a’upega e talitonu e mafai ona oo atu i Amerika.

I se faamatalaga la mai le faigamalo a Kiripati ua ta’ua ai latou te lē lagolagoina le faata’ita’iga a Amerika i ogasami o le Pasefika ma e tusa pe lē o taula’i atu faata’ita’iga ia Kiripati ae o le popolega ona o le faaaogā pea o le Vasa Pasefika e fai ai nei faata’ita’iga.

Fai mai Kiripati e tumau le latou finau ina ia puipuia le lumana’i filemu o le Pasefika ma le malupuipuia o le lumana’i o ona tupulaga.

Puna o Faamatalaga: https://www.rnz.co.nz/international/pacific-news/533455/kiribati-voices-concern-over-ongoing-missile-testing-in-the-pacific-ocean