Ua amata faagasolo le filifiliina o le auvaa o le Peresetene ua filifilia nei o le a faafoeina le faigamalo a le malo tele o Amerika i le isi 4 tausaga, Donald Trump pe a faamae’a aloa’ia le paea’iga o loo iai nei.
O se tasi o tofiga tāua tele i le faigamalo a Amerika o lē o le a ta’ita’ia pe o le Faatonu lea o le vaega latou te faamaopoopo uma ma mata’itūina faamatalaga tāua mai atunuu eseese, o faamatalaga tau militeli ma faamatalaga i totonu lava o le atunuu, auā le puipuia o le atunuu atoa; ma o lea ua filifilia ai e Trump le tamaitai mai le konekeresi, o Tulsi Gabbard.
I se saunoaga a Trump na ia ta’ua ai, lona fiafia tele e tofia le tamaitai sa avea ma Congresswoman, Lieutenant Colonel Tulsi Gabbard, e avea ma Faatonu poo le Director o le National Intelligence (DNI).
Na saunoa foi Trump, ua silia ma le luasefulu tausaga o iai Tulsi i le vaega’au e tautua mo lo tatou Atunuu ma se Sa’olotoga o Tagata Amerika.
Na amata auai atu Gabbard i le Hawaii Army National Guard i le tausaga e 2003 ma suia atu ai i le Army Reserve i le tausaga e 2020. O le taimi nei o loo ia umia le tulaga o se lieutenant colonel.
O le tausaga e 2013 e oo i le 2021, na tautua ai Gabbard i le Konekeresi o se sui o le Democrat mo le setete o Hawaii.
E lei manuia lana taumafaiga na tauva ai i le 2020 o se sui faata’ita’i o le Democrat mo le tofiga o le peresitene, mulimuli ane ai loa ua ia faasee ese mai lea vaega faaupufai, le Democrat ae avea o se sui tuto’atasi i le 2022.
Na amata i le tausaga lava lea e 2022 ona ia lagolagoina le tele o sui tauva o le vaega faaupufai a le Republic na tauva i faigapalota (midterm elections) i lea tausaga, a o lei aga’i atu ai loa ma lagolagoina Trump i le masina o Aokuso.
O ia foi o le ta’ita’ifono lagolago i le vaega o loo gafa ma le tapenaina o le faasee atu o Trump i lona tofiga o le Peresetene.
Na saunoa Trump, “Ona o lea sa avea muamua Tulsi o se sui faatū a le Democrat mo o le sa’ilia o se Peresetene, lona uiga la o lea ua lautele atu lana lagolago mo vaega faaupufai uma e lua, auā o lea ua mitamita nei e avea ma ta’ua o ia o se Republican!”
Na faasilasila mai le filifiliga o Tulsi i le aso mulimuli ane mai le aso na tofia ai e Trump le alii o John Ratcliffe e avea ma ana Faatonu o le CIA.
O le tamaitai o Tulsi Gabbard, na fanau i Leloaloa i Amerika Samoa i le tausaga e 1981, ma o ia e lona fā mai se fanau e to’alima a ona mātua.
I le lua o ona tausaga na aga’i ai Tulsi ma lona aiga ma nonofo i Hawaii, ma o iinā a o talavou lenei tamaitai, sa ia lagolago i le faavaeina o le Healthy Hawaii Coalition, o se faalapotopotoga e galulue fua mo le a’oa’oina o fanau ina ia iloa ona ola ma tausia i latou lava faapea ma le tausia o le siosiomaga.
O se tamaitai e naunau tele e lagolago malosi tulafono ma faiga faavae mo le tausia ma faasao le siosiomaga, ma o le tausaga e 2002 na tauva ai Tulsi mo se sui o le fono faitulafono a le Setete o Hawaii ma avea ai o se tagata pito laitiiti muamua lea ua filifilia mo lea tofiga.
I le tausaga na sosoo ai, na auai atu Tulsi i le Hawaii National Guard e faatino ai lana auaunaga mo tagatānuu uma o Hawaii.
O lona tamā o le Samoa ae iai foi lona pito Europa, ae o lona tinā na fanau i Indiana ma soifua ane i Michigan.
O lenei tofiga ua maua e Tulsi ua faailoga ai se taimi muamua ua seei ai se tagata Amerika e iai ona piitaga Samoa ma le Hindu i lenei tofiga.
E ui e leai sona tupuaga Initia, ae talu mai ona tausaga talavou, sa auai ma tausia a’e i latou e o latou mātua i le lotu Hindu, ma o loo ta’ua i lipoti sa faaigoa foi i latou uma e to’alima e o latou mātua i ni igoa faa-Hindu.
O lona tinā o Carol Porter Gabbard, ma lona tamā o Mike Gabbard sa avea ma Senatoa o le Setete o Hawaii.
O le tofiga ua tofia ai nei Tulsi, o loo ta’ua i lipoti afai ae faamaonia, o lona uiga o le a ia taulimaina i lana vaaiga faalapotopotoga e 18 (intelligence organisations) ma o ia foi o le a faaautū iai le vaavaaiga o faamatalaga e logopuialii ai le Peresetene i aso ta’itasi (President’s Daily Brief).
O Tulsi o se niece e faasino i si tamaitai polofesa o Caroline Sinavaiana-Gabbard lea na maliu ia Me o le tausaga lenei 2024 ina ua tagatavaleina e se tasi foi tamaitai lea o loo faagasolo ai nei faamasinoga.
O Tulsi e faaipoipo atu i lona to’alua, le alii o Abraham Williams.
