O fagupa’u vai laiti poo single plastic water bottles o loo taatele lona faaaogāina ma lafoa’i solo e nisi pe a uma ona faaaogā, o se tasi lea o taumafaiga a le ofisa o le Malo o Peletania i Samoa e taofia ai le salalau solo o fagu uga o loo utu ai vai.
O le taumafaiga a lea malo e ala i lona ofisa i Samoa ua saunia ai faguvai lapopoa mo tama ma teine o loo aooga i le Iunivesite a le Pasefika i Alafua le USP Samoa Campus.
E 12 nofoaga o le iunivesite ua faatutū ai masini e faamālūlū ai faguvai ina ia maua ai e fanau aoga lea vaega manaomia i aso ta’itasi, o se faiga o le a lē toe faaaogāina ai faguvai pa’u laiti ma feololo o loo masani ona latou faaaogā.
I se pepa faalauiloa o loo faaalia ai e le ofisa o le Malo o Peletania i Apia, o se tasi lea o auala e a’oa’oina ai tama ma teine talavou o le iunivesite i auala saogalemu ma talafeagai e puipuia ai le siosiomaga mai le faaleagaina e otaota e pei o uga poo plastics.
O le kamupani o le Pacific Pure Waters ua galulue faatasi ma le ofisa o le malo Peletania mo le tuuina atu o lea tautua ma auaunaga mo le Iunivesite a le Pasefika i Saute i Alafua.
