O le a iai se tapulaa i le aofa’i o tamaiti a’oga faavaomalo e a’oa’oina i iunivesite ma a’oa’oga maualuluga i Ausetalia i le tausaga fou.
O le minisita o A’oga, Jason Clare sa ia faia lea folafolaga i le vaiaso nei ma ta’ua ai e 270 afe le numera o le a faatapulaa ai, o se vaega o fetuuna’iga a le Malo i le vaega o a’oa’oga.
O le a aofia ai ma le tapulaa e 145 afe i tamaiti a’oga fou i iunivesite e faatupe lautele i Ausetalia ma vocational institutions i le 2025.
Ta’ua o A’oa’oga faavaomalo na maua ai le $47.8 piliona i le tamaoaiga o Ausetalia i le 2023 pe a fua i faamaumauga a le Matagaluega o a’oga.
Ta’ua e le minisita o le a faatulaga lava vaega e fua iai le faai’uga e faia i le mataupu lea i a’oga e aofia ai.
Fai mai e iai tamaiti a’oga e lē aofia ai i lalo o le fetuuna’iga lea, aemaise i latou o tamaiti a’oga faavaomalo o loo faia ni suesuega poo research ma i latou o loo ave faailoga PHD, tamaiti a’oga o loo lagolago e le Malo ma tamaiti a’oga mai le Pasefika ma Timor Leste.
