E silia i le fituselauafe tala le tau o le galuega ua mae’a sa toe faatelē ai le maota maliu o le maota gasegase i Motootua, i le faamoemoe o le malo ia lava le avanoa o le potu e faaaogā e aiga i taimi e fia asiasi ma aveese ai o latou tagata maliliu.
Ua mafai ai nei foi ona faatau nisi o aisa tetele mo le mapu iai o maliu lea o le a faaopoopo ai le 36 maliu i le 12 o loo mafai ona tuu i lea falemaliu i le taimi nei.
O lona uiga a taunuu mai aisa fou e 6 i le masina fou o Me ma faapipii ona mafai lea ona mapu i le maota maliu i le maota gasegase o Tupua Tamasese Meaole le 48 tino maliu.
E lē aofia ai le aisa o loo faapitoa mo tino maliu mo ni su’esu’ega a leoleo pe afai e masalomia ni gaioiga solitulafono e fesoota’i i le mafua’aga o se maliu.
I le tatalaina o lea galuega na faailoa ai e le Minisita o le Soifua Mālōlōina, o se tasi lea o fuafuaga sa faataoto mai i le taimi o le faama’i misela na fano ai ola ma soifua e 83, faapea le pepesi malosi o le faama’i Koviti-19 i le lalolagi i le tausaga e 2020 lea e faitau miliona ola ma soifua na fano ai.
Le afioga Valasi Luapitofanua Toogamaga Tafito Selesele, o le Minisita o le Matāgaluega o le Soifua Mālōlōina.
O Tesema o le tausaga na te’a nei na taofia ai le toe faaaogāina o le falemaliu i le falema’i i Motootua a o fuafua le faatinoina o le galuega ua mae’a nei.
O lea ua toe tatala mo le faaaogāina, ae mo le taimi nei e na o le 12 maliu o loo mafai ona tuu ai, a o tālia aisa fou e taunuu i le masina fou ma faaopoopo ai loa le numela o maliu e mafai ona mapu i lea auaunaga a le malo, o se auaunaga e mana’omia tele e le atunuu i aiga e fia maua se faamāmā avega tau tupe, ma e lē gafatia tau a falemaliu tuma’oti.
