O tapenaga o le Fono a Malo o le Taupulega ia Oketopa, ua faailoa ai i tapenaga le muamua faagasolo o nisi o fonotaga a o lei tatala le fono autū mo ta’ita’i o Malo o le Taupulega.

O le fono e talanoaina ai mataupu i aiātatau, e sosoo ma le fono mo tupulaga talavou, o le fonotaga a tamaitai ma fono mo tagata o malo o le taupulega faapea le fonotaga mo mataupu tau pisinisi.

O le aso 18 i le aso 19 o Oketopa e faia muamua ai ia fonotaga, a o lumanai le aso 25 o lea lava masina e tatala aloaia ai le fono a Malo o le Taupulega lea o le a malele ai lana Maiesetete le Tupu o Peletania i lona tulaga o le faauluuluga o Malo uma o le Taupulega e tatala le faatasiga.

O le saunoaga faalauaitele mai le ta’ita’i o le Malo le afioga i le Palemia, afioga Fiame Dr Naomi Mataafa, e faailoa ai i le atunuu tulaga ua iai tapenaga, sa ia faailoa ai ma le autū o le fono, e pei ona faamatalaina i le gagana peletania “One resilient common future, transforming our common wealth.”

A faaliliu i le tataou gagana o le faatāua o le tasi o le faamoemoe mo se lumanai e gafatia ma faaauauina e ui i le tele o faafitauli i le vaavaai lea i ni auala e aupito sili ona lelei e iloilo ai le fetāla’i ma toe fuafua faai’uga i le tofu sao uma iai o le to’atele o tagata.

O le masina o Aokuso o le tausaga e 1974 na avea ai Samoa ma sui o Malo o le Taupulega ma ua 54 ai nei tausaga le matua o le tatou atunuu i totonu o lea li’o o Malo o le lalolagi.