O faamaumauga mai le masina o Tesema o le tausaga 2024 i le faagaioia o talosaga o le sitiseni Niu Sila o tagatānuu Samoa e agavaa, ua faailoa ai e le matagaluega o mataupu tau lotoifale a le malo o Niu Sila le Internal Affairs Department e 49 talosaga ua mae’a ona iloiloina ua talia, ina ua faamalieina uma aiaiga e agavaa ai tulaga tagatānuu o Niu Sila.

Ua faailoa e le sui ofisa sili o pulega o lea matagaluega i se lipoti a le leitio a Niu Sila e 154 talosaga na oo atu talu ona amata faagaioi le sitiseni Niu Sila o tagata Samoa e agavaa ina ua pasia le tulafono taufaaofi o le sitiseni Samoa o le tausaga e 1982.

O le 154 lea o talosaga o loo aofia ai le 71 o talosaga mai Samoa.

E to’a fasefuluiva tagata ua avea nei ma tagatānuu o Niu Sila ae tasi le tagata na teena lana talosaga ona e lē agavaa e tusa o aiaiga.

Ua faailoa e le sui ofisa sili o le matagaluega o le lotoifale a Niu Sila o Maria Robertson i lea lipoti e silia i le 500 tagata na oo atu i le ofisa o le Komesina Maualuga o Niu Sila i Samoa ina ua tatala i le aso 26 o Novema o le tausaga ua alu atu nei le faauluina o talosaga o le sitiseni Niu Sila o tagata Samoa.

E tusa ma le 3,500 tagatānuu Samoa o loo soifua mai pea i le taimi nei e agavaa ma e leai se taimi faatapulaa e tuuina atu ai talosaga.

O lona uiga e toe faaauau pe a toe a’e galuega o lenei tausaga fou.

O i latou ua faamanuiaina talosaga ua toe faafoi pe refund a latou tupe na totogi e faagaioia ai o latou sitiseni Niu Sila.