Ua faaopoopo atu le tau’au o Niu Sila e lagolago atu ai i nisi o poloketi i le Pasefika.
O Amerika lea o loo fesoasoani i le faatupeina o ia poloketi ma ua tuuina atu iai e Niu Sila ma lana foi lagolago e $16.4 miliona.
O le feiloaiga a le Minisita o le Va i Fafo a Niu Sila, Winston Peters ma le failautusi o le malo tele o Amerika o Anthony Blinken i Uosigitone i le po anapo lea ua faailoa mai ai lea faamoemoe i se pepa o faamatalaga fai faatasi a malo lua.
O le a saunia la e Niu Sila le $8.2 miliona e lagolago ai le sootaga faaonaponei, digital connectivity i Tuvalu e faaaogā ai le Pacific Connect Cable ma le isi $8.2 miliona e lagolago ai i le fausia o se vaa suesue i mataupu tau faigafaiva ma le vasa mo komiuniti a le Pasefika.
Ua faailoa foi e Peters o loo iai le faamoemoe e agai i luma le mafutaga lea i mataupu tau fefaatauaiga ma le tamaoaiga ma le malo tele o Amerika.
O le vaa suesue e pei ona faailoa o le a kiliva ai faamatalaga tāua i Atumotu o le Pasefika e fesoasoani ai ia i latou ia lava le silafia i le puleaina o ona puna’oa tau faigafaiva ma malupuipuia ona vasa.
Puna o Faamatalaga: https://www.1news.co.nz/2024/04/12/nz-strengthens-ties-with-us-pledges-164m-for-indo-pacific-ventures
