O se pepa o faamatalaga ua tu’uina mai le ofisa o le Palemia ua faailoa ai le faamalolo le tumau ai o le tamaita’i Loia Sili a le Malo ia Savalenoa Mareva Betham faapea ai le failautusi o le Fono Aoao Faitulafono o Samoa ia Tiatia Graeme Tualaulelei i le aso ananafi 20 o Aokuso, 2021.
Ua faailoa mai lea pepa o faamatalaga le lē faatuatuaina pe talitonuina e le Tamaita’i Palemia o Samoa o le Tamaitai Loia Sili i le faatinoga o ona tiute o se tasi o ofisa sili ona taua mo le faatinoga o galuega tau le tulafono i totonu o le atunuu.
E o gatusa le faamalolo ai o Savalenoa ma le fautuaga foi a le Fofoga Fetalai e faatatau i le faamaloloina le tumau ai o le Failautusi o le Fono.
Ua tuuina atu ia i laua uma ina ia tali mai e le silia le Aso Gafua 30 o Aokuso, 2021, e tusa ai o lo laua faamalologa e ala i mafuaaga ua tuuina atu, e tusa ai ma tulaga sa faatino ai o laua tiute ma galuega.
Ua faaali manino mai foi o le a tilotilo totoa le Tamaita’i Palemia e tusa ai o tulaga o le a tuuina atu e le Loia Sili i lana tali
Ina ia mafai ai ona faia se faaiuga mulimuli e talafeagai ai, le toe faaauau o ona tiute po’o le leai foi i se tasi o tofiga o lo’o i le taulotoaiga o le faatulagaina mai o se faigamalo faatulafonoina i Samoa e pei foi o isi malo faatemokarasi i le lalolagi.
E tai lua vaiaso le umi ua faamalolo le tumau ai i laua ia, peitai a’o le’i tuuina mai le pepa o faamatalaga i le aoauli nei o le faamalologa o ia tofi, sa maua se isi foi pepa o faamatalaga mai le Ta’ita’i o le HRPP e faailoa ai ua ia silafiaina le faamalolo ai o le Loia Sili.
Na ia taua e le’o se tulaga e faateia ai lea tulaga ua loa ona ia silafia le tulaga lea e oo iai le Loia Sili ona o lona finau atu lava i le lē faatulafonoina o le faatautoga sa faia i lalo o le faleie i le aso 24 o Me,2021.
Ua faaalia e le Tamaita’i Palemia o loo faalagolago atu i le Matagaluega e pulea tagata faigaluega a le Malo le PSC e ala I le faatinoina o ona tiute ina ia mautinoa e sa’o ma tonu, e aunoa ma faiga faapolokiki tiute o tagata faigaluega o le Malo.
O lea tulaga ina ia mafai ai ona tulaga lelei le suiga mai le faigamalo talu ai i le faigamalo o loo ua tulai nei.
