E lē o faigofie le faaiuga pe tatau ona talia Winston Peters ma lana NZ First i totonu o le osiga malo e taitaia Niu Sila.
O ananafi i le taeao na fai mai ai le taitai o le National Christopher Luxon, e faatoa iloa lava le iuga o Winston Peters pe a uma le faigapalota i le aso 14 o le masina fou.
Peitai i faaiuga o faigapalota faapolokiki a ofisa faasalalau e aofia ai ma le palota a le Newshub-Reid Research poll na sau i tua anapo, o loo sau ai e moomia lava e le National ma ACT le NZ First e osi ai le isi faigamalo.
I le faaiuga o le palota a le Newshub na sau i tua anapo, e na o le 49 nofoa a le National, ACT e 11 ma o lea la te moomia ai nofoa e 6 a le NZ First.
O le palota foi lenei mo le uluai taimi ua pasia ai e Christopher Luxon o le National, Chris Hipkins o le Labour i le mamao e 24% faatusa i le na o le 19.1% a Hipkins i le Palemia e mananao iai tagata.
O le faaiuga a Luxon ua faia e na te lē o momotu esea le ono galulue ma Winston Peters, o loo lagolagoina e lē sa avea ma Palemia i tausaga talu ai, John Key ona e lē o iloga ona ma’oti le palota o loma nei.
