Ua siamupini uma ‘au e lua a Niu Sila i le faamoemoe o le taamilosaga taitoafitu a le lalolagi sa faagasolo le isi ona vae i le atunuu o Hong Kong i le faaiuga o le vaiaso na mavae atu nei seia oo mai i le amataga o le vaiaso.
O le ‘au tamaitai le Black Ferns na manumalo ia Ausetalia i le la taaloga finau e mae’a ane le taimi, malo Niu Sila 26-17.
I le itupa o alii na faatoilalo ai foi e le All Blacks faamoemoega o Fiti mo se malo ina ua mae’a le taimi, sili Niu Sila i ‘ai e 24-17.
O le faalua ai lea ona tulai mai tulaga faapea e manumalo uma ai ‘au a alii ma tamaitai a Niu Sila i nei tausinioga ma ua tutumau ai pea i le pito i luga o le faatulagana o ‘au e le gata i alii faapea foi tamaitai, i le mae’a o le vae lea i Hong Kong.
O le alii o Cody Vai se tasi o alo o Samoa lea sa tulaga ese foi lona taumafai i lea taamilosaga ma sa muamua foi sikoa mo Niu Sila i le sailiga o le ipu autu.
