O le aoaoga lenei ua mafai ona faataunuuina e tauala mai le faigapaaga a le Malo o Ausetalia ma le Malo o Samoa ua ta’ua o le Tautua ua mafai ai ona faatinoina e se tasi e iai le tomai faapitoa i le puipuia lea o fanau mai faafitauli o loo feagai ma i latou. 

I faamatalaga mai le Ofisa o le Komesina o Ausetalia, o Donna Webb o ia lea o loo gafa ma nei aoaoga ma polokalame e fefaasoaa’i ai le tomai i mataupu o le puipuiga o fanau na ia galue ai i le silia ma le 20 tausaga. 

O loo agai tonu lenei aoaoga i faalapotopotoga ma sosaiete lea na auai ai nisi o sui mai le asosi o tina o loo faia a latou faatoaga. 

E pei ona ta’ua e le sui o Poloketi a lenei asosi, Ofusina Laulala le tāua o lenei aoaoga.

“E telē se aogā o lenei aoaoga mo matou tina o loo aofia uma ai nisi o vaega o loo mafai ona tapu’e ai le malamalama i mea e fesoasoani ai i tina o lenei asosi.” 

Na ta’ua e Webb o se avanoa lelei lea e lagolagoina ai faalapotopotoga i Samoa e ala i le tomai faasoa e fesoasoani ai ia latou tiute ma galuega o loo faatinoina.

“O aoaoga nei o se ata lea o le galulue faatasi ai ina ia mautinoa le puipuia o fanau aemaise lo tatou amanaia o a latou aiātatau.” 

Na ia faafetaia ai foi i latou na auai i lenei aoaoga mo le faasoaina o manatu e ala i faafitauli o loo feagai ai i totonu o le atunuu e patino i lenei aoaoga. 

O le Tautua e valu tausaga o lenei faigapaaga e agai lea i mataupu tau le atina’eina o le soifuaga o tagata ma nisi o vaega o loo ave iai le faamuamua a lenei faigapaaga e aofia ai soifua maloloina, itu tau aoaoga, o i latou e iai aafiaga tumau o le soifuaga ma le puipuiga lautele.