A o faagasolo ai tapenaga mo le fonotaga tele a Malo e 56 o le Taupulega e talimalo ai Samoa i le masina fou, o loo iai se Fonotaga mo Tupulaga a Malo o le Taupulega mo mataupu tau i le Palemene, le Commonwealth Youth Parliamentary Meeting o loo faia i Ueligitone.
O le fonotaga lona sefululua talu ona faavae lea polokalame o tupulaga a Malo e 56 o le Taupulega.
O lea polokalame ua faamauina, o se avanoa lelei ua tuufaatasia e atia’e ai le tomai ma agavaa o tupulaga talavou i itu tau polokiki, o le malamalama i tomai faatemokalasi, o pulega lelei, ta’ita’iga o se malo faapea sootaga va lelei.
Ta’ua i pepa o faamatalaga, o lenei fonotaga o le a mafai ai e talavou ona talanoaina ma o latou a’oa’oina nisi o ta’iala ma le faatulagaga o itu i le faasologa o mataupu faapalemene e pei o le faailoa ma faatino se faata’ita’iga o le talanoaina o se pili i totonu o le Maota Fono, o le finauina o mataupu i komiti faalepalemene, ma le saunia o tulafono taufaaofi ma le tele o vaega e aga’i i le faufauina o se malo faatemokalasi.
E oo atu i le to’a onosefuluvalu sui auai mai Malo o le Taupulega.
O i latou nei e mai le va o le 18 tausaga aga’i i le 29 tausaga le matutua o sui auai, ma e to’alua talavou o loo fai ma sui o Samoa.
Sa taumafai atu le Radio Samoa mo se faatalanoaga peitai e lei manuia.
O le vaiaso atoa lenei o loo faagasolo ai lenei fonotaga tāua.
