O le Aso Faraile o le vaiaso nei e iloa ai i se faai’uga a le faamasinoga pe talia pe teena le talosaga a le loia a sui faasalalau o le polokalame o le Maota o Viiga i Sini Ausetalia, e taofi le su’esu’eina o moliaga o le faia o faasalalauga taufaaleaga.
O loo faavae lea finauga i le mau e leai se malosi’aga faaletulafono o le faamasinoga a Samoa e tagofia ai le matāupu, ona o lē ua tagi e faamautū i Niu Sila, a o ē ua molia e aumau i Ausetalia ma faafoe ai le la auaunaga faasalalau.
O loo finau le loia a leoleo e iai le malosi’aga faaletulafono o le faamasinoga a Samoa e su’esu’eina ai moliaga ona o i la’ua o loo molia e tele sootaga i Samoa.
O loo finau foi le itu a leoleo e ui o loo faamautū i fafo le auaunaga faasalalau o loo faafoe e i la’ua o loo molia ae o faasalalauga i luga o upega tafa’ilagi o loo faaaogā e mafai ona maimoaina i Samoa ma soo se atunuu.
O le Aso Faraile e aumai ai foi le faai’uga a le faamasinoga pe talia le talosaga a leoleo e faaaogā fesoota’iga faatekonolosi i upega tafailagi e faia mai ai le molimau tuu fofoga a lē o loo tagi.
