O le tagi tau palota ua faaulu atu i le tuana’i o le palota laitiiti a Vaimauga 3, e sefulufā le aofa’iga atoa o ia moliaga.
O le 13 o tuua’iga o faiga faaālatua sa ave ai tupe i tagata palota ma le faamoemoe e faatosina ai le latou filifiliga.
E 300 tālā le maualuga o le seleni na faaaogā i se tasi o gaioiga faaālatua.
O le isi moliaga e tasi o tuua’iga o le ave o taumafa e aafia ai apa eleni ma pisupo ma o ia moliaga uma o loo tuua’ia ai le afioga Lautimuia Afoa Uelese Vaai i lona tuuina atu i tagata palota e sefulutolu o tagata palota foi ia o le a molimau e lagolago ia moliaga.
O le Aso Gafua na faaulu ai le tagi tau palota a le afioga Taioaliiseu Fiti Aimaasu sa tauaveina le tofi faipule o le itumalo ina ua manumalo i le palota tele ia Aokuso o le tausaga ua mavae, lea na filifilia ai sui usufono o le paea’iga 18 a le Palemene.
Peita’i na faamavae ma le patī faaupufai e puipuia aiā tatau a tagata ona ua suia lana lagolago i le vaega faaupufai o le Faatuatua i le Atua Samoa ua Tasi, lea na māfua ai ona faia le palota laitiiti na toe manumalo ai le faipule filifilia ua molia i le tagi tau palota.
